અધ્યાય – ૩


મેષ લગ્નના ભિન્ન ભિન્ન ભાવોમાં ચંદ્રનું ફળ નીચે મુજબ છેઃ


પ્રથમ ભાવ –
પહેલા ભાવમાં ચંદ્ર એના મિત્ર મંગળની મેષ રાશિમાં રહ્યો છે, એના પ્રભાવથી જાતકને સુખ અને માનસિક શાંતિ મળશે. જાતક વિવેકી, બુધ્દિમાન, સુંદર શરીરવાળો અને ભૂમિ, મકાન અને ગૃહજીવનનું સુખ સારું પ્રાપ્ત કરશે. પ્રથમ ભાવનો ચંદ્ર એના સામાન્ય મિત્ર શુક્રની રાશિ તુલા પર દ્રષ્ટિ કરે છે, એટલે જાતકને વ્યવસાયમાં સફળતા અને સ્ત્રીસુખમાં પ્રસન્ન્તા મળશે.
મનનો સ્વામી ચંદ્દ જ્યારે કેન્દ્રમાં હોય ત્યારે જાતક પ્રસન્ન મનનો હોય છે. તે સુખ, શાંતિ, સ્વાસ્થ્ય, ઉન્નતિ અને પ્રસન્ન દામ્પત્ય અનુભવે છે.


દ્વિતીય ભાવ –
બીજા ભાવમાં વૃષભનો ઉચ્ચ ચંદ્ર એના સામાન્ય મિત્ર શુક્રની રાશિમાં હોય તો જાતક ધનવાન અને જમીનજાયદાદવાળો થાય છે. જાતકના કુટુંબમાં પણ વૃધ્દિ થાય છે. જાતકને આ સ્થાનમાં માતૃસુખની કંઈક ઊણપ જણાય છે.
આ સ્થાનથી ચંદ્ર આઠમા સ્થાનમાં એના મિત્ર મંગળની વૃશ્ચિક રાશિ પર દ્રષ્ટિ કરે છે એટલે જાતકને આયુષ્ય, સ્વાસ્થ્ય અને આકસ્મિક પ્રાપ્તિમાં ઊણપ અનુભવાય છે. દૈનિક જીવનમાં પણ કંઈ અશાંતિ રહે છે.

તૃતીય ભાવ – ત્રીજે ચંદ્રમા એના મિત્ર બુધની મિથુન રાશિમાં છે. આથી જાતકને ભાઈ-બહેનોનું સુખ અને પરાક્રમની વૃધ્દિ થાય છે. જાતકની માનસિક સ્થિતિ પ્રબળ હોય છે. ભુમિ, મકાન વગેરેનું સુખ પ્રાપ્ત કરી આનંદમય જીવન ગાળે છે.
આ સ્થાનથી ચંદ્ર એના મિત્ર ગુરુની નવમે ધન રાશિને જુએ છે. એટલે જાતક વિદ્વાન, ભાગ્યશાળી, ધર્મી, દાની અને ઉદાર સ્વભાવવાળો થાય. જીવનમાં ધન અને યશની પ્રાપ્તિ કરી સદાચારી માર્ગે જીવન જીવે.

ચતુર્થ ભાવ –  ચોથા ભાવમાં ચંદ્ર સ્વરાશિ કર્કમાં સ્વક્ષેત્રી છે, એટલે માતા, ભૂમિ, મકાન, સંપત્તિ વગેરેનું સંપૂર્ણ સુખ જાતકને મળે છે. મનોરંજનનાં વિવિધ સાધન પણ જાતકને સદૈવ પ્રાપ્ત થાય.
 ચોથા ભાવથી ચંદ્ર શનિની મકર રાશિવાળા દસમા ભાવ પર દ્રષ્ટિ કરે છે, એટલે જાતકને પિતાથી અણબનાવ અને રાજકીય કાર્યોમાં કંઈ અધૂરપ જણાય. આ ભાવનો જાતક માતાથી સુખી, પિતાથી વિમુખ છતાં ધન, સંપત્તિ અને આનંદનો ઉપભોગ તો કરે જ છે.

પંચમ ભાવ – આ ભાવમાં ચંદ્ર એના મિત્ર સૂર્યની સિંહ રાશિમાં છે, એટલે જાતક વિદ્વાન બુદ્ધિમાન અને સન્તતિવાન થાય. એને સંપત્તિ, મકાન અને મનોરંજનનું સુખ મળે છે.

પાંચમા ભાવથી ચંદ્ર અગિયારમા ભાવમાં શનિની કુંભ રાશિ પર દ્રષ્ટિ કરે છે, એટલે જાતકને ધન, સંપત્તિ માટે સંઘર્ષ કરવો પડે, છતાં શાન્ત સ્વભાવથી સંઘર્ષમાં પણ તેને સફળતા મળે છે. આવા જાતકો શાંત, સંતોષી, ચતુર, સંપત્તિવાન, વિદ્વાન અને સતત સંઘર્ષરત રહી સફળ થનારા હોય છે.

ષષ્ઠ ભાવ – છઠ્ઠા સ્થાનનો ચંદ્ર  એના મિત્ર બુધની કન્યા રાશિમાં રહ્યો છે, એટલે જાતકના ગૃહજીવનમાં અધૂરપ અને અશાંતિ રહે છે; પરંત્તુ શત્રુ પક્ષ પર વિજયી થઈ ધૈર્ય અને વિનમ્રતાથી વિપત્તિઓને પડકારે છે.      

      છઠ્ઠા સ્થાનના ચંદ્રની દ્રષ્ટિ બારમા સ્થાને એના મિત્ર ગુરુની મીન રાશિ પર પડે છે, એટલે જાતક સદકાર્યોમાં અધિક સમય ગાળે છે અને જન્મ સ્થાનથી ઘણે દૂર બીજા સ્થાનોમાં સુખ અને સમૃદ્ધિ પામે છે.ઽઅવા જાતકો ધૈર્યવાન, વિનમ્ર, ગૃહજીવન્ન દુઃખી અનેક પ્રકાર્ની આંટીઘુંટીમાં અટવાયેલા અને ખર્ચાઓમાં ફસાયેલા હોય છે.  

સપ્તમ ભાવ – સાતમા ભાવમાં ચંદ્ર એના સામાન્ય મિત્ર શુક્રની તુલા રાશિમાં છે. એના પ્રભાવથી જાતકને સૌંદર્ય, ભોગવિલાસ અને સ્ત્રીસુખની પ્રાપ્તિ થાય છે. સાથે સાથે વૈભવ અને વ્યવસાયમાં પણ સફળતા મળે છે.      

     સાતમા ભાવનો ચંદ્ર પહેલા ભાવમાં એના મિત્ર મંગળની મેષ રાશિને જુએ છે. એટલે જાતકને શારીરિક સૌષ્ઠવ, સુખ, આનંદ અને યશની પ્રાપ્તિ નિરંતર થતી રહે છે. આવા જાતક વિલાસ અને વૈભવવાળા, વ્યવસાયમાં સફળ અને યશ-સન્માન પ્રાપ્ત કરનાર હોય છે.

  અષ્ટમ ભાવ – આઠમા આયુ, મૄત્યુ અને વ્યાધિના ભાવમાં મંગળની વૃશ્ચિક રાશિમાં રહેલો ચંદ્ર ભૂમિ અને જંગમ સંપત્તિને નુકશાન કરે છે, માતૄસુખની ઊણપ અને ગૄહજીવનમાં અશાંતિ સર્જે છે. એનું આયુષ્ય સંકટોથી ભરેલું  અને દૈનિક જીવન અસ્તવ્યસ્ત હોય છે. ઘણું કરીને એને જન્મભૂમિથી દૂર રહેવું પડે છે.           

આ ભાવથી ચંદ્રની દ્રષ્ટિ બીજા ભાવ પર પડે છે, એટલે સુખ અને સંપત્તિનો યોગ એને મળતો રહે છે, છતાં એની પ્રાપ્તિ માટે એને સતત પ્રયત્નશીલ રહેવું પડે છે.

નવમ ભાવ  – નવમા ભાવમાં ત્રિકોણ સ્થાનમાં એના મિત્ર ગુરૂની ધન રાશિમાં રહેલો ચંદ્ર જાતકને શક્તિ, સામર્થ્ય આપી માતા, ભૂમિ અને સંપત્તિનું સુખ આપે છે.     

          ધર્મ ભાવમાં રહેલા ચંદ્રથી જાતકનું મન ધાર્મિક કર્મોમાં લીન હોય છે અને દાન, પુણ્ય અને તીર્થયાત્રામાં સત્કાર્યો કરાવે છે.        

       નવમા સ્થાનનો ચંદ્ર એના મિત્ર  બુધની મિથુન રાશિને ત્રીજા સ્થાનમાં જુએ છે, એટલે જાતકના પરાક્રમની વૄદ્ધિ અને ભાઈ-બહેનોનું સુખ પણ મળે છે.      

         આ ભાવનો જાતક સદભાગી, સુખી, ધનસંપત્તિવાળો, પરાક્રમી અને ધર્માચરણ કરવાવાળો હોય છે.  

દશમ ભાવ – રાજ્ય, વ્યવસાય, કર્મ અને કેન્દ્રમાં શનિની મકર રાશિમાં રહેલો ચંદ્ર પિતાથી વૈમનસ્ય, રાજ્યથી સન્માન અને પરિશ્રમથી વ્યવસાયમાં સફળતા મેળવે છે.

             દશમા ભાવનો ચંદ્ર ચોથા ભાવમાં પોતાની જ કર્ક રાશિ પર દ્રષ્ટિ કરે છે, એટલે માતા તરફથી સુખ મળે છે. ભૂમિ – સંપત્તિ વગેરેનો પણ લાભ થાય છે.

          આ ભાવનો જાતક માતાથી સુખી પણ પિતાથી દુઃખી; પ્રયત્નથી અને મનોયોગથી સંપત્તિ સુખ પામે છે.  

એકાદશ ભાવ – અગિયારમા ભાવમાં લાભસ્થાનમાં શનિની કુંભ રાશિમાં રહેલો ચંદ્ર આવકનાં સાધનોમાં  ઊણપ અને અસંતોષ પેદા કરી જાતકનું જીવન કઠિન બનાવે છે,  છતાં સ્વપ્રયત્નથી પરિશ્રમી જાતક સફળતાની કેડી કંડારે છે.

            આ ભાવના ચંદ્રની દ્રષ્ટિ એના મિત્ર સૂર્યની સિંહ રાશિ પર પડે છે, એટલે જાતકની વિદ્યામાં અને  સંતાનોમાં વૄદ્ધિ થાય છે. આ ભાવનો જાતક વિદ્વાન,  સંતતિવાળો અને પ્રયત્નથી સંપત્તિ ભોગવનારો થાય છે.

દ્વાદશ ભાવ – બારમા ભાવમાં ચંદ્ર એના સામાન્ય મિત્ર ગુરુની મીન રાશિમાં હોય છે. જાતક કાર્યોમાં ઠાઠમાઠથી એનો વૈભવનો વ્યય કરે છે. બાહ્યબ સ્થાનોમાં સંબંધો અને પ્રતિષ્ઠા શ્રેષ્ઠ હોય છે.

           આ ભાવમાંથી ચંદ્ર એના મિત્ર બુધની કન્યા રાશિ ઉપર છઠ્ઠા સ્થાનમાં દ્રષ્ટિ કરે છે, એટલે  જાતક શત્રુપક્ષ સાથે સંયમ અને શાંતિથી કામ લે છે અને કલહોનું નિરાકરણ ચતુરાઈથી અને સફળતાથી કરે છે.

        આ ભાવનો જાતક સુખી અને સંતુષ્ટ જીવન ગાળે છે. શત્રુપક્ષ પર શાલીનતાથી અને સંયમથી વિજય પ્રાપ્ત કરે છે. 


મેષ લગ્નના ભિન્ન ભિન્ન ભવોમાં સૂર્યનું ફળકથન નીચે પ્રમાણે છે;

પ્રથમ ભાવ – શરીરસ્થાનમાં ઉચ્ચનો સૂર્ય એના મિત્ર મંગળની રાશિમાં છે; તેથી જાતક મધ્યમ કદનો સ્વસ્થ, સ્વાભિમાની, પ્રભાવી અને પરમ વિદ્વાન થશે – એની વાણી પ્રભાવ અને પ્રતિષ્ઠા આપનારી હશે અને સંતાનો પ્રબળ, બુધ્દિમાન, વ્યવહારકુશળ અને મહત્ત્વકાંક્ષી હશે.
પરંતુ સાતમા ભાવમાં સૂર્યની દ્રષ્ટિ હોવાથી સ્ત્રી અને દામ્પત્ય સુખમાં કલેશ અને કષ્ટ રહેશે. જિવનવ્યવહારમાં સંધર્ષ કરવો પડશે. આવા જાતકોની પત્ની અહંકારી અને મનસ્વી હોય છે.
દ્વિતીય ભાવ – ધનસ્થાનમાં સુર્ય એના શત્રુ શુક્રની રાશિમાં છે. જેથી જાતકને આર્થિક વિંટંબણા રહેશે. સંતાનો તરફથી ચિંતા રહેશે અને એમની વિદ્યા પણ સાધારણ રહેશે.
વૃષભનો સૂર્ય પૂર્ણ દ્રષ્ટિ થી એના મિત્ર મંગળના વૃશ્ચિક રાશિના આઠમા ભાવને
જુએ છે; તેથી જાતક દીર્ધાયુષી થશે અને ભૂમિગત ધન કે આકસ્મિક અર્થલાભ થશે; પરંતુ અનેક મથામણો પછી પણ વધુ ધનસંચય દુષ્કર બનશે.
તૃતીય ભાવ – ત્રીજા પરાક્રમ સ્થાનમાં સૂર્ય એના મિત્ર બુધની રશિમાં છે; તેથી જાતક વિદ્યા અને વક્તૃત્વમાં કુશળ હશે અને પરક્રમી હશે.
સૂર્ય સાતમી દૃષ્ટિથી ભાગ્ય અને ધર્મસ્થાનને જુએ છે, તેથી જાતક ધર્માત્મા, દાની અને તીર્થયાત્રા કરવાવાળો થાય. ઉપાસના અને આરાધનાથી મંગળ કાર્યોની વૃદ્ધિ કરે.
ત્રીજા સ્થાનનો શક્તિશાળી સૂર્ય જાતકને તેજસ્વી વ્યક્તિત્વ અને પ્રાભાવશાળી વક્તૃત્વ આપશે.
ચતુર્થ ભાવ – એના મિત્ર ચંદ્રામાની રશિમાં રહેલો સૂર્ય જાતકને ભૂમિ, મકાન અને વિવિધ સુખોનો ભોક્તા બનાવે છે. વિદ્યાના લાભ સાથે સૂર્યની ઉગ્રતાને ચંદ્રની શીતળતાનું નિયંત્રણ મળશે અને સંતુલન સચવાશે.
ચોથા ભાવમાં સૂર્ય એની પૂર્ણ દૃષ્ટીથી દસમા ભાવમાં શનિની રાશિને જુએ છે, એટલે જાતકને પિતા સાથે અણબનાવ, રાજ્ય તરફથી પીડા અને વિફળતા મળે છે છતાં એના પ્રભાવથી સન્માન તો જરુર મળશે.
પંચમ ભાવ – વિદ્યા અને સંતાનના પાંચમા ભાવમાં સૂર્ય સ્વક્ષેત્રી છે; તેથી જાતક વિદ્વાન, બુદ્ધિમાન અને ઓજસ્વી વાણી પ્રાપ્ત કરે. પ્રતાપી પુત્રનો જાતક પિતા થાય.
પાંચમેથી સૂર્ય એના શત્રુ શનિની કુંભ રાશિને અગિયારમા સ્થાનમાં જુએ છે; તેથી સંપત્તિ માટે સતત સંધર્ષ કરવો પડે.
આ જાતકની ઉગ્ર અને કટુવાણીથી સફળતા તો મળે છે, પરતું એના ટિકાકારો અને હિતશત્રુ પણ વધે છે.
ષષ્ઠ ભાવ – છઠ્ઠા સ્થાનનો સૂર્ય એના મિત્ર ગુરુના મીન રશિવાળા બારમા વ્યય સ્થાનને જુએ છે; તેથી જાતક ખર્ચાળ છતાં બાહ્ય સંબંધોમાં સફળતા પ્રાપ્ત કરે છે. એને સ્વદેશ કરતાં વિદેશમાં વધુ સન્માન મળશે. આ સૂર્યના પ્રભાવથી સંતાન સંબંધી એને સતત ચિંતા રહેશે.
રોગ અને શત્રુના સ્થાનમાં રહેલી બુધની રાશિ જાતકને વિદ્યાની પ્રાપ્તિમાં કઠિનતા અપાવે છે. ઉગ્ર સ્વભાવનો ગ્રહ છઠ્ઠા સ્થાનમાં શક્તિશાળી બને છે; તેથી જાતક વિદ્વાન, અને શત્રુને સદૈવ પરાજિત કરનારો થાય.
સપ્તમ ભાવ – સાતમા સ્ત્રી, સ્વાસ્થ્ય અને વ્યવસાયના ભાવમાં તુલા રશિમાં સૂર્ય નીચનો થઈને એના શત્રુની રાશિમાં છે, એના પ્રભાવથી જાતક દુર્બળ રહેશે અને સ્ત્રી સંબંધી કંઈ ને કંઈ તકલીફ ઊભી થશે.
સાતમા સ્થાનથી સૂર્ય એના મિત્ર મંગળની મેષ રાશિને જુએ છે, એટલે આ જાતક લાંબા કદનો થશે. એ સ્વાભિમાની થશે અને યુક્તિપ્રયુક્યિથી સન્માન અને પ્રભાવ પ્રાપ્ત કરશે.
સૂર્યની આ સ્થિતિને કારણે સંતાનસુખ અલ્પ અને સ્ત્રીનું સુખ પણ સારું નહીં મળે. જીવનનિર્વાહમાં પણ સદા કઠિનતા અને વિદ્યાક્ષેત્ર પણ નબળું રહેશે.
અષ્ટમ ભાવ – આઠમા આયુષ્ય, મૃત્યુ, વ્યાધિના ભાવમાં સૂર્ય એના મિત્ર મંગળની વૃશ્ચિક રાશિમાં હોય છે, એનાથી વિદ્યાપ્રાપ્તિમાં કઠિનતા અને સંતાન પક્ષથી સતત ચિંતા રહે છે. એના આયુષ્યમાં વૃદ્ધિ થશે, આકસ્મિક કેટલાક લાભ પણ થશે છતાં દૈનિક જિવનમાં નાનીમોટી ઉપાધિઓ તો રહેશે જ.
આઠમા સ્થાનનો સૂર્ય બીજા સ્થાનમાં એના શત્રુ શુક્રની વૃષભ રાશિ પર દ્રષ્ટિ કરે છે, એટલે જાતકે ધનસંચય અને નિર્વાહ માટે વધુ પ્રયત્ન કરવા પડશે, છતાં થોડોઘણો અસંતોષ તો રહેવાનો.
નવમ ભાવ – નવમા ભાગ્ય, ધર્મ અને વિદ્યાના સ્થાનમાં ત્રિકોણસ્થાનમાં સૂર્ય એના મિત્ર ગુરુની ધન રાશિમાં રહ્યો છે, એટલે એને શ્રેષ્ઠ બુદ્ધિ, વુદ્યા અને જ્ઞાન મળશે. આવો જાતક ધર્માત્મા, શાસ્ત્રજ્ઞ, ઈશ્વરભક્ત, ન્યાયી, દયાળુ, તીર્થપ્રેમી અને દાનવીર હોય છે.
આ સ્થાનથી સૂર્ય ત્રીજા પરાક્રમ સ્થાનમાં બુધની મિથુન રાશિ પર દ્રષ્ટિ કરે છે, એટલે જાતક ભાઈ-બહેનવાળો પરાક્રમી, પુરુષાર્થી અને શ્રેષ્ઠ યોગ્યતાવાળો થાય. આ સ્થાનમાં સૂર્યની શ્રેષ્ઠ સ્થિતિ હોય છે.
દશમ ભાવ – રાજ્ય, પિતા, વ્યવસાય અને પ્રતિષ્ઠાવાળા દસમા કેન્દ્રસ્થાનમાં સૂર્ય એના શત્રુ શનિની મકર રાશિમાં રહેલો છે. એના પ્રભાવથી જાતક પિતા, વ્યવસાય, નોકરી અને માન – પ્રતિષ્ઠાના ક્ષેત્રમાં અધુરપ અનુભવે છે; પરન્તુ આવા જાતકનું રાજભાષા અને વિદેશી ભાષામાં સારું પ્રભુત્વ હોય છે.
આવો જાતક અહંકારી, અસહિષ્ણુ અને ક્રોધી સ્વભાવનો હોય છે. મકર રાશિનો દશમા સ્થાનનો સૂર્ય ચોથે એના મિત્ર ચંદ્રમાની કર્ક રાશિને પૂર્ણ દ્રષ્ટિથી જુએ છે, જેથી જાતકને ભૂમિ, મકાન તથા માતાનું સુખ સારુમ મળશે; એના બુદ્ધિબળથી રાજનીતિમાં કે વ્યવસાયમાં પણ સફળતા પ્રાપ્ત કરશે.
એકાદશ ભાવ – અગિયારમા સ્થાનનો કુંભ રાશિનો સૂર્ય જાતકને અર્થ પ્રાપ્તિ માટે કઠિન પરિશ્રમ કરાવે છે. અગિયારમા સ્થાનનો સૂર્ય ઉગ્ર અને અત્યંત શક્તિશાળી હોય છે, એટલે જાતકને લાભ અને સંપત્તિ તો મળશે જ; પરંતુ એ માટે શારીરિક શ્રમ અને બુદ્ધિબળનો સતત ઉપયોગ કરવો પડશે.
આ સ્થાનના સૂર્યની દ્રષ્ટિ એની જ રાશિના પંચમ સ્થાન પર પડે છે, એટલે જાતક સંતાન, વિદ્યા, બુદ્ધિમાં સમૃદ્ધ હશે. ઉગ્રવાણીથી એ સ્વાર્થની સિદ્ધિ પણ કરી શકશે.
દ્વાદશ ભાવ – વ્યય, હાનિ, દંડ અને રોગના બારમા ભાવનો સૂર્ય એના મિત્ર ગુરુની મીન રાશિમાં છે. એ વધુ ખર્ચ કરાવશે અને બાહ્ય સ્થાનો સાથે ઘણો સારો સંબંધ રખાવશે. જિવનનિર્વાહ માટે બુદ્ધિને કસવી પડશે. સંતાન પક્ષે ચિંતા રહેશે અને પ્રસંગોપાત નુકશાન પણ ઉઠાવવું પડશે.
આ સ્થાનનો સૂર્ય છઠ્ઠા સ્થાનમાં એના મિત્ર બુધની કન્યા રાશિ પર દ્રષ્ટિ કરે છે. આથી જાતક નિર્ભિક રહી શત્રુને પરાજિત કરશે.
મેષ લગ્નના જાતક કૃશ શરિરવળા, વાચાળ, ઉગ્ર સ્વભાવવાળા, અહંભાવી, ચંચળ, ચતુર, ધર્માચરણ કરવાવાળા અને અલ્પસંતતિવાન હોય છે. તેઓ બુદ્ધિમાન, પરિવારપ્રેમી અને ભોજનપ્રિય હોય છે. તેઓ શરીરે લાલાશ પડતા હોય છે.
તેમના જીવનમાં છ, આઠ, પંદર, એકવીસ, છત્રીસ, ચાલીસ, પિસ્તાલીસ, છપ્પન અને ત્રેસઠનાં વર્ષોમાં ધનહાનિ અને શારીરિક કષ્ટો પડે છે.
મેષ લગ્નના જાતકનાં સોળ, વીસ, અઠ્ઠાવીસ, ચોત્રીસ, એકતાલીસ, અડતાલીસ અને એકાવનનાં વર્ષો ભાગ્યવૃદ્ધિ, વાહનસુખ અને સંપત્તિની પ્રાપ્તિનાં છે. આ વર્ષમાં એમને ઐશ્વર્ય અને આનંદ મળશે.
આ લગ્નના જાતકોને દેહ સંબંધમાં મંગળ, ભાગ્ય સંબંધમાં ગુરુ અને ઉપર્યુક્ત પુરુષાર્થ અને ભાઈબહેનોના સંબંધોમાં બુધ કષ્ટદાયક છે. મેષ લગ્નવાળા
જાતકોને ધનલાભ માટે શનિ અને શુક્ર શુક્ર શુભ ફળ આપનાર છે.

મેષ લગ્નમાં ભિન્ન ભિન્ન રાશિઓમાં અને ભાવોમાં રહેલા સૂર્ય, ચંદ્ર, મંગળ, બુધ, ગુરુ, શુક્ર, શનિ, રાહુ અને કેતુનું ફળ વિસ્તારથી આગળની પોસ્ટમાં આપવામાં આવશે.